“መድፈኞቹ የሊጉን ዘውድ ይደፋሉ” አርሰን ቬንገር

የአርሰናል ዝነኛና ስኬታማ የቀድሞ አሰልጣኝ አርሰን ቬንገር ክለባቸው የዘንድሮውን የኢንግሊዝ ፕሪሚየር ሊግ ዋንጫ እንደሚያነሳ ያላቸውን ጽኑ እምነት ገልጸዋል።

ፈረንሳዊው አሰልጣኝ አርሰናል ካለው ወቅታዊ ብቃት ባሻገር፣ ዋነኛው ተፎካካሪ ማንቸስተር ሲቲ ነጥቦችን እንደሚጥል በመተንበይ ለመድፈኞቹ ደጋፊዎች ትልቅ ተስፋን ሰጥተዋል።

አርሰን ቬንገር ስለ አርሰናል የሻምፒዮንነት ግስጋሴ ሲናገሩ“አርሰናል ፕሪሚየር ሊጉን እንደሚያሸንፍ አምናለሁ፤ በዚህ በጣም እርግጠኛ ነኝ። ለእኔ ይህ መሆን የሚችልና የሚሳካ ነገር ነው” ብለዋል።

በተለይ ደግሞ የፔፕ ጋርዲዮላው ማንቸስተር ሲቲን ተሳትፎ በሚመለከት ሲያስረዱ፣ ሲቲዎች እንደ ልማዳቸው የውድድሩን መዝጊያ በበላይነት እንደማይጨርሱና በመንገዳቸው ላይ እንቅፋት እንደሚገጥማቸው አመልክተዋል።

ይህ አስተያየት አርሰናል በአሁኑ ሰዓት እያሳየ ካለው የታክቲክ ብስለትና የአካል ብቃት ጥንካሬ ጋር ተዳምሮ የዋንጫውን ግምት ወደ ሰሜን ለንደን አዘንብሎታል።

አርሰን ቬንገር በአርሰናል ቤት ለ22 ዓመታት (ከ1996-2018) በቆዩባቸው ጊዜያት ክለቡን ወደ ዘመናዊ የእግር ኳስ ፍልስፍና የቀየሩ ታላቅ ሰው ናቸው። በቆይታቸውም፦

3 የፕሪሚየር ሊግ ዋንጫዎችን ማሸነፍ ችለዋል።

7 የኤፍ ኤ ካፕ (FA Cup) ዋንጫዎችን በማንሳት በታሪክ ከፍተኛውን ክብረወሰን ይዘዋል።

ከሁሉም በላይ ደግሞ በ2003/04 የውድድር ዘመን ሳይሸነፉ (The Invincibles) የሊጉን ዋንጫ በማንሳት እስካሁን ድረስ ያልተሰበረ ታሪክ አስመዝግበዋል።

ቬንገር አርሰናልን ከሜዳ ውጪም ቢሆን በስታዲየም ግንባታና በፋይናንስ አስተዳደር ረገድ ራሱን የቻለ ተቋም እንዲሆን ትልቅ መሰረት ጥለዋል።

የማይረሳው የአርሰን ቬንገር አሻራ ዛሬም በክለቡ ውስጥ የሚሰማ ሲሆን፣ የእሳቸው የድጋፍ ቃል ለሚኬል አርቴታ ተጫዋቾች በስነ-ልቦና ረገድ ትልቅ አቅም እንደሚፈጥር ይታመናል።

መድፈኞቹ የቬንገርን ትንቢት እውን አድርገው ከሁለት አስርት ዓመታት በኋላ የፕሪሚየር ሊጉን ዘውድ ይደፉ ይሆን? የሚለው የብዙዎች ጥያቄ ሆኖ ቀጥሏል።