የኢትዮጵያ ዲፕሎማሲ ከጥገኝነት ወደ ልዕልና

ትናንት የኢትዮጵያ የውጭ ግንኙነት በርዕዮተ ዓለም ታጥሮ፣ ሀገራዊ ጥቅሟ ሳይሆን የተወሰኑ ቡድኖች ሕልውና በሚጠበቅበት የመዋቅር ስብራት ውስጥ ወድቆ ነበር።

ከዳያስፖራው ጋር የነበረው ግንኙነት በጥርጣሬ እና በጠላትነት የታጠረ፣ ከምዕራባውያን ጋር የነበረው ትሥሥር ደግሞ በዕርዳታ እና በብድር ቀንበር የተተበተበ በመሆኑ፣ ሀገራችን ዲፕሎማሲያዊ ነፃነቷን አጥታ እና አንገቷን ደፍታ እንድትቆይ ተገዳ ቆይታለች።

ሆኖም ግን “ሲታጠብ የማይለቅቅ ቆሻሻ፣ ሲነገር የማይሰማ ሞኝ የለም” እንዲሉ፣ ያ ያለፈው የታሪክ ጠባሳ ዛሬ በመደመር ዕሳቤ መፈወስ ጀምሯል።

ገቢር ነበብ የውጭ ግንኙነታችን ውስጥ “የቆጡን አወርድ ብላ የብብቷን ጣለች” የሚል ዓይነት የብቸኝነት ፉክክር ሳይሆን በትብብር እና በጋራ ተጠቃሚነት ላይ የቆመ ሚዛናዊ ጉዞ ነው።

ዓለማችን በፈጣን የጂኦፖለቲካ ለውጥ ውስጥ ባለችበት በዚህ ወቅት፣ በአንድ ርዕዮተ ዓለም ብቻ ተቸክሎ መቅረት ለውድቀት እንደሚዳርግ በመገንዘብ፣ የመደመር መንግሥት ተላማጅነትን እና ተለማጭነትን የዲፕሎማሲው መሪ አድርጎታል።

ይህም “ሰው በሰውነቱ፣ ሀገር በሀገርነቱ ይከበራል” የሚለውን መርሕ በመያዝ ከምዕራቡም ሆነ ከምሥራቁ ዓለም ጋር የጥቅም ሚዛንን የጠበቀ ግንኙነት መመሥረት ተችሏል።

የብሪክስ አባልነታችን እና የደቡብ-ደቡብ ትብብር መጠናከሩ ኢትዮጵያ በዓለም አቀፍ መድረክ ድምጿ ጎልቶ እንዲሰማ ያደረገ የዲፕሎማሲ ድል ነው።

ሀገር በቀሉ የመደመር እሳቤ “ጎረቤትህን እንደ ራስህ ውደድ” የሚለውን ጥንታዊ እሴት ወደ ቀጣናዊ ትሥሥር ቀይሮታል። ኢትዮጵያ የቀጣናው የሰላም ዘብ እና የልማት ሞተር መሆኗን በተግባር አሳይቷል።

በታላቁ የሕዳሴ ግድብ ድርድር ወቅት የታየው “የፍትሐዊ አጠቃቀም” ጽናት እና የአረንጓዴ ዐሻራ ዲፕሎማሲያችን፣ ሀገራችን በዓለም አቀፍ የአየር ንብረት ድርድር ላይ የሞራል የበላይነትን እንድትቀዳጅ አድርጓታል።

ዛሬ ኢትዮጵያ በዜጋ ተኮር ዲፕሎማሲዋ የልጆቿን ክብር እያስጠበቀች፣ በቴክኖሎጂ ሽግግር እና በወደብ አማራጮች ላይ ያላትን ስትራቴጂያዊ ተጽዕኖ እያሳደገች ትገኛለች።

“ድል በኅብረት፣ ክብር በመከባበር” እንደሚገኝ በማመን፣ የመደመር ፍልስፍና ኢትዮጵያን በዓለም አቀፍ መድረክ ተከባሪ፣ በኢኮኖሚ ራሷን የቻለች እና በቀጣናው የማይታለፍ ኃይል እንድትሆን መንገዱን ጠርጓል።

ይህ ጉዞ ዛሬን መሻገር ብቻ ሳይሆን፣ ለነገው ትውልድ የምትመች እና ልዕልናዋ የተረጋገጠ ጠንካራ ሀገርን እውን የሚያደርግ የዲፕሎማሲ ጥበብ ነው።

#የኢቢሲ ዶትስትሪም ኤዲቶሪያል