ቻይና አሜሪካን የሚያሰጉ ሚሳኤሎችን ለኢራን ማቅረቧ ተሰማ

ቻይና ለአሜሪካ የጦር መርከቦችና የአውሮፕላን ተሸካሚዎች ትልቅ ስጋት የሆኑትን እጅግ ዘመናዊ “ሃይፐርሶኒክ” ፀረ-መርከብ ሚሳኤሎችን ለኢራን ማቅረቧ የተሰማ ሲሆን፣ ይህም በዓለም አቀፍ ደረጃ ከፍተኛ ድንጋጤን ፈጥሯል። ይህ መረጃ እውነት ከሆነ፣ አሜሪካና እስራኤል በኢራን ላይ የከፈቱት “ኦፕሬሽን ኤፒክ ፉሪ” አቅጣጫውን ሊቀይር እንደሚችል ተገምቷል። እነዚህ ሚሳኤሎች በከፍተኛ ፍጥነት የሚጓዙና በአየር ላይ አቅጣጫቸውን የመቀየር ብቃት ያላቸው በመሆናቸው፣ አሜሪካ መርከቦቿን ለመጠበቅ የምትጠቀምባቸውን ዘመናዊ የመከላከያ ሥርዓቶች (እንደ Aegis ያሉ) ክፉኛ ሊፈትኑ እንደሚችሉ ተነግሯል።

ይህ አደገኛ የጦር መሣሪያ ዝውውር የተሰማው፣ ሩሲያ በግጭቱ ሂደት ላይ ያላትን ስጋት በገለጸችበት እና እንደ እንግሊዝ፣ ፈረንሳይና ጀርመን ያሉ ሀገራት የባሕር ላይ የነዳጅ መስመሮችን ለመጠበቅ በጦርነቱ ውስጥ ጠለቅ ብለው ለመሳተፍ በሚያስቡበት ወቅት ነው። ፕሬዝዳንት ትራምፕ የኢራን ወታደራዊ ዕዝ መፈራረሱን ቢገልጹም፣ ኢራን እንዲህ ዓይነት ቴክኖሎጂዎችን ማግኘቷ ግን በዓለም አቀፍ አጋሮቿ አማካኝነት አሁንም ጠንካራ ስልታዊ አቅም እንዳላት ማሳያ ተደርጎ ተወስዷል። በየመን የሚገኙ አማጺያንም በቀይ ባሕር ላይ ያሉ የጥምረት ሀገራት መርከቦችን ኢላማ እንደሚያደርጉ ያስጠነቀቁት ከዚሁ የቴክኖሎጂ ድጋፍ ጋር በተያያዘ ሊሆን እንደሚችል ተጠርጥሯል።

በሌላ በኩል፣ የዚህ ዓይነት የጦር መሣሪያ መኖር በዓለም አቀፍ የነዳጅ ገበያ ላይ ከፍተኛ መናጋት እየፈጠረ ይገኛል። የሳዑዲ አረቢያው ራስ ታኑራ የነዳጅ ማጣሪያ መዘጋት እና ኳታር የተፈጥሮ ጋዝ ምርቷን ማቋረጧ ገበያውን ቀድሞውኑ ያናጋው ሲሆን፣ አሁን ደግሞ በባሕር ላይ “ሃይፐርሶኒክ” ሚሳኤሎችን ያካተተ ግጭት ሊፈጠር ይችላል የሚለው ስጋት ሁኔታውን ይበልጥ አባብሶታል። ዋይት ሀውስ በቻይና ጣልቃ ገብነት ላይ እስካሁን ይፋዊ ምላሽ ባይሰጥም፣ ወታደራዊ ተንታኞች ግን የአሜሪካ ዋና የጦር መርከቦች ላይ ጥቃት ቢሰነዘር ቀውሱ ወደ ታላላቅ የዓለም ኃያላን አገራት ጦርነት ሊያመራ እንደሚችል እያሰጠነቀቁ ነው።

(Addisadmas)