በቴፒ ከተማ ተቋቁሞ አገልግሎት  እየሰጠ ያለው  የመሶብ አንድ ማዕከል ከእንግልትና ከምልልስ እንደታደጋቸው ተገልጋዮች ተናገሩ

ከተቋቋመ አጭር ጊዜ ያስቆጠረው ማዕከሉ ከ1ሺህ 286 በላይ ለሆኑ ዜጎች አገልግሎት ተደራሽ ማድረጉም ተገልጿል።

ቀደም ሲል የመንግሥት አገልግሎት ለማግኘት ከቢሮ ቢሮ መመላለስና ረዥም ጊዜ መቆየት የተለመደ መሆኑን የገለፁት ተገልጋዮቹ አሁን ላይ በቴፒ ከተማ አገልግሎት እየሰጠ ያለ መሶብ የአንድ ማዕከል  ይህንን ታሪክ እየቀየረ መሆኑን  ተናግረዋል።

በዚህም ፈጣን፣ ቀልጣፋና ያለ ምንም እንግልት በአንድ ማዕከል የተለያየ አገልግሎት እያገኙ መሆኑን የገለጹት ተገልጋዮቹ  አሰራሩ  ተጠናክሮ መቀጠል እንዳለበት ሀሳብ ሰጥተዋል።

የቴፒ መሶብ አንድ ማዕከል ዋና ዳይሬክተር መለሰ ናኑ  በቅርብ ጊዜ ዉስጥ ተመርቆ ሥራ የጀመረው ይህ ዘመናዊ ማዕከል፣ የተለያዩ የመንግሥት አገልግሎቶችን በአንድ ጣሪያ ስር በማጠቃለል የሕዝቡን ድካም በማቅለል አገልግሎት እየሰጠ ይገኛል ብለዋል።

ማዕከሉ ከተበታተነ አሰራር ወጥቶ አገልግሎቶችን በአንድ ቦታ ከማሰባሰቡም በላይ በቴክኖሎጂ የታገዘ የኦንላይን አገልግሎት በመስጠት ወደ ዲጂታል ሥርዓት ሙሉ በሙሉ ያሸጋገረ መሆኑን ገልፀዋል።

በዚህም እስካሁን ባለው አጭር ጊዜ ውስጥ ከ1 ሺህ 286 በላይ ዜጎች ተጠቃሚ መሆናቸውን ገልጸው፣ ሕዝቡ ይህንን ዕድል ተጠቅሞ ያለምንም ስጋት አገልግሎት እንዲያገኝ ጥሪ አቅርበዋል።