እንደ አዕዋፍ በሰማይ የሚበርር፣ እንደ ዓሣ በባሕር የሚዋኝ ዓለምን ያስገረመው አስደናቂው “ስካይ ኤክስ” ቴክኖሎጂ

ከሰማይ ከፍታ ወደ ጥልቅ የባሕር ውስጥ ዓለም ያለምንም ችግር መሸጋገር የሚችለው ይህ አዲስ ተሽከርካሪ የቴክኖሎጂውን ዓለም እጅግ እያስደመመ ይገኛል።

ታዋቂው የቻይና የቴክኖሎጂ ኩባንያ ‘ቻንግሻ ናይትሃውክ ኢንተለጀንት ቴክኖሎጂ’ በሰማይ ላይ የመብረር እና በውኃ ውስጥ የመዋኘት አስገራሚ አቅም ያለውን “ስካይ ኤክስ” (SkyX) የተሰኘ እጅግ ዘመናዊ ተሽከርካሪ ለዕይታ አቅርቧል።

ከተፈጥሯዊው በራሪ ዓሣ (Flying fish) ንድፍን በመውሰድ የተሠራው ይህ ተሽከርካሪ፣ በአየር ላይ በሚሆንበት ጊዜ ክንፎቹን ዘርግቶ በአስገራሚ ሁኔታ የሚበር ነው።

ወደ ውኃ ውስጥ ሲገባ ደግሞ ክንፎቹን በማጠፍ በቀላሉ መንቀሳቀስ ያስችለዋል።

ይህ አስደናቂ ፈጠራ በውኃ ውስጥ በሰዓት እስከ 50 ኪሎ ሜትር በሚደርስ ከፍተኛ ፍጥነት መጓዝ የሚችል ሲሆን፣ በአየር ላይ ደግሞ እስከ አንድ ሰዓት ድረስ ያለማቋረጥ የመብረር አቅም አለው።

ቴክኖሎጂው በርካታ የዲዛይን ሙከራዎችን እና በእውነተኛ የውኃ ውስጥ ፍተሻዎችን በተሳካ ሁኔታ ያለፈ ሲሆን፣ አሁን ላይ ለተለያዩ ግዙፍ ዓላማዎች እንዲውል ሰፊ ጥናት እየተደረገበት ይገኛል።

በተለይም ለድንገተኛ አደጋ አድን ሥራዎች፣ ለውቅያኖስ ጥበቃ እና ክትትል፣ እንዲሁም ለመከላከያ እና ደኅንነት ዘርፎች ትልቅ አስተዋጽኦ ያበረክታል ተብሎ ከፍተኛ ተስፋ ተጥሎበታል።