የተደበቁ ሀብቶች በአደባባይ፡ የደቡብ ምዕራብ ኢትዮጵያ አዳዲስ የቱሪዝም ገጽታዎች

የደቡብ ምዕራብ ኢትዮጵያ ህዝቦች ክልል በተፈጥሮ የታደለ ቢሆንም፣ እነዚህን ጸጋዎች ለዓለም አቀፍና ለሀገር ውስጥ ቱሪዝም ምቹ በሆነ መንገድ አቀናጅቶ በማቅረብ ረገድ ለረጅም ጊዜ ክፍተቶች ነበሩ። ይሁን እንጂ በገበታ ለሀገር እና በገበታ ለትውልድ መርሃ ግብሮች አማካኝነት የተገነቡት ፕሮጀክቶች ክልሉ ያለውን እምቅ አቅም ወደ ተጨባጭ ኢኮኖሚያዊና ውበታዊ ፋይዳ ቀይረውታል።

የሀላላ ኬላ እና የዝሆን ዳና ሎጅ (ገበታ ለሀገር)

በዳውሮ ዞን የሚገኘው የሀላላ ኬላ ሎጅ የታሪክ፣ የባህል እና የተፈጥሮ ውህደት ማሳያ ነው። ጥንታዊውን የንጉሥ ሀላላ የድንጋይ ግንብ ታሪክ ከዘመናዊ የእንግዳ ተቀባይነት አገልግሎት ጋር በማስተሳሰር፣ ቀደም ሲል ተዘንግቶ የነበረውን የታሪክ አሻራ ወደ ገቢ ምንጭነት ቀይሮታል።

በተጨማሪም በኮንታ ዞን የሚገኘው የዝሆን ዳና ሎጅ፣ የክልሉን የዱር እንስሳት ሀብት በተለይም ዝሆኖችን ለማየት ለሚመጡ ቱሪስቶች ምቹ ማረፊያ ከመሆኑ ባለፈ፣ አካባቢው ያለውን የተፈጥሮ ደን ሳይነካ ለቱሪዝም ክፍት እንዲሆን አድርጓል። እነዚህ ፕሮጀክቶች ክልሉን በዓለም አቀፍ የቱሪዝም ካርታ ላይ ጎልቶ እንዲታይ አድርገውታል።

የደንቢ ሎጅ (ገበታ ለትውልድ)

በቤንች ሸኮ ዞን የተገነባው የደንቢ ሎጅ ደግሞ በ”ገበታ ለትውልድ” መርሃ ግብር የተከናወነ ድንቅ ስራ ነው። ሎጁ በተፈጥሮ ፏፏቴዎችና ጥቅጥቅ ባሉ ደኖች መካከል መገንባቱ ለጎብኚዎች ልዩ የመንፈስ እርካታን ይሰጣል። ይህ ፕሮጀክት የአካባቢዉን ውበት በዘመናዊ መስተንግዶ አጅቦ ለገበያ ያቀረበ ስራ ነው።

እነዚህ ፕሮጀክቶች ከህንፃ ግንባታ ባለፈ ለክልሉ ዘርፈ ብዙ ጥቅሞችን አስገኝተዋል።ቀደም ሲል ተደራሽ ባልነበሩ ተፈጥሯዊ ስፍራዎች ላይ የተገነቡት እነዚህ ሎጆችና ሪዞርቶች፣ የክልሉን ገጽታ በመቀየር የቱሪስት ፍሰቱን በእጅጉ ጨምረውታል።

ለአካባቢው ወጣቶች በሆቴልና ቱሪዝም፣ በግብርና አቅርቦት እና በጎብኚዎች መሪነት (Tour Guiding) ሰፊ የስራ ዕድል ፈጥረዋል።

ወደነዚህ ፕሮጀክቶች የሚያመሩ መንገዶች፣ የቴሌኮም እና የኤሌክትሪክ አገልግሎቶች መሟላት ለአካባቢው ማህበረሰብም ተጨማሪ ፋይዳ ሆኗል።

የመንግስት አቅም፡ የተደበቀን ሀብት የማውጣት ጥበብ

እነዚህ ፕሮጀክቶች በተገነቡበት ፍጥነትና ጥራት መጠናቀቃቸው መንግስት ያለውን የተደበቀን ሀብት የማውጣት አቅም በግልጽ ያሳያሉ።ተፈጥሯዊ ጸጋዎችን ለይቶ የማወቅና ወደ ፕሮጀክት የመቀየር ብቃትን አሳይቷል።

ህዝቡንና ባለሀብቱን በማስተባበር ትላልቅ ፕሮጀክቶችን በአጭር ጊዜ ውስጥ ማጠናቀቅ እንደሚቻል ማሳያ ሆነዋል።

እነዚህ ፕሮጀክቶች ክልሉ ለዘመናት ሳይጠቀምባቸው የቆዩትን የተፈጥሮ ስጦታዎች ወደ ኢኮኖሚያዊ እሴት በመቀየር፣ የመንግስት የልማት አቅጣጫ ውጤታማ መሆኑን መስክረዋል።

በአጠቃላይ የሀላላ ኬላ፣ የዝሆን ዳና እና የደንቢ ሎጅ የደቡብ ምዕራብ ኢትዮጵያ ህዝቦች ክልል አዲስ የቱሪዝም መዳረሻ እንዲሆን ከማድረጋቸውም በላይ፣ የሀገር በቀል እውቀትንና የተፈጥሮ ሀብትን በማቀናጀት የኢኮኖሚ እድገትን ማፋጠን እንደሚቻል ማረጋገጫዎች ናቸው።
‎www.mashafm.gov.et